Kryetari i Lidhjes Demokratike të Kosovës (LDK), Lumir Abdixhiku, është shprehur i shqetësuar për “ekzistencën e një polarizimi të thellë të shoqërisë kosovare dhe e ka paraqitur [Rrugën e Re] si një rrugëdalje të mundshme për të ardhmen e vendit”.
Abdixhiku ka theksuar se polarizimi i shoqërisë ka vazhduar të rritet dhe se pushteti aktual po ndan dhe përçan popullatën në vend.
Në një klimë të tensionuar, sipas tij, përplasjet dhe krizat vazhdojnë të përhapen, ndërkohë që qytetarët ndihen të braktisur dhe spektatorë të fatit të tyre.
“Polarizimi i shoqërisë sonë nuk ka të ndalur. Pushteti po na ndanë, po na përçanë, po na lë në të njëjtin vend. Përplasjet na vijnë çdo ditë, krizat po aq shpesh, e ne jemi shndërruar spektatorë të fatit tonë teksa njerëz me plot urrejtje a pa vullnet për punë vendosin për ne”, ka shkruar ai në rrjetin social Facebook.
Kryetari i LDK-së nëpërmjet një videoje ka treguar se ka takuar përfaqësues të shoqërisë civile, gazetarë, ligjërues universitarë dhe biznese të mëdha në vend.
Abdixhiku ka thënë se gjendja e tanishme nuk përfaqëson “vërtetësisht popullin e Kosovës dhe se ka potencial të jashtëzakonshëm për të ndryshuar dhe për të ndaluar gabimet e të kaluarës”.
“Pavarësisht bindjeve që mund t’i kemi, pavarësisht dallimeve që mund t’i gjejmë, ju ftoj të mbështesni Rrugën e re. Rrugën që s’bën gabimet e së shkuarës e ndalon theqafjen e tashme. Rrugën që s’merret me të kaluarën, por thjeshtë na bën të ardhmen. Rruga e re ka filluar dhe nuk do të ndalet. Rruga e re ka nevojë për mbështetjen tënde”, ka shkruar Abdixhiku.