Deputetja e Partisë Demokratike të Kosovës, Ganimete Musliu, ka reagur pasi Gjykata Themelore e Prishtinës e ka dënuar mërgimtarin Driton Maloku me 6 muaj burgim për kanosje ndaj saj.
“Sot Gjykata e dënoi me gjashtë muaj burg personin që më kanosi në dhjetor të vitit të kaluar, pas një debati të ashpër që kisha me kryeministrin Kurti në seancë plenare”, ka shkruar Musliu.
Tutje, ajo ka shkruar se “ky person që më kanosi nga Zvicra, të premten në seancë tha se nuk voton në Kosovë prej 20 vitesh” dhe pranimin e fajësisë e bëri krejt formalisht e në mënyrë të pasinqertë. Por, në një pikë, ai ishte shumë i sinqertë. Deklaroi se “kishte rënë nën ndikimin e propagandës së Lëvizjes Vetëvendosje”.
Ndër të tjera, sipas saj “ky është një shembull konkret se gjuha me të cilën partia – shtet i ushqen militantët e saj, është gjuhë e urrejtjes, përçarjes dhe mosdurimit. Dhe si e tillë jo vetëm e papranueshme, por edhe e dënueshme”.
“Përndryshe, konsideroj se dënimi ndaj personit që më kanosi është shumë i ulët dhe do të konsultohem me avokatin tim për të ndërmarrë veprimet e nevojshme për ta kundërshtuar me ankesë”, ka përfunduar Musliu.