Bashkimi Evropian ka thënë se do të marrin masa edhe ndaj Serbisë nëse nuk bën asgjë drejt shtesionimit të situatës, por, kjo vendoset nga shtetet anëtare të BE-së.
Kështu ka thënë zëdhënësi i BE-së, Peter Stano, në një konferencë për media të enjten, i cili theksoi se qasja e BE-së është e paanshme.
Kështu duke komentuar letrën që dhjetëra ligjvënës euro-perëndimorë u dërguan zyrtarëve të lartë të Shteteve të Bashkuara dhe Bashkimit Evropian për ndryshimin e qasjes ndaj Kosovës dhe Serbisë, Stano, ka theksuar se politikën e jashtme të BE-së e përcaktojnë vendet anëtare të tij.
Sipas tij, ndaj Kosovës janë marrë masa pasi nuk ka vepruar në menyrë evropiane.
“Ajo që kemi bërë më së fundi në dritën e përshkallëzimeve që ndodhën është vendosja e disa masave kundër qeverisë së Kosovës për shkak të paaftësisë për të vepruar në një mënyrë evropiane drejt shtensionimit dhe marrjes së hapave të rëndësishëm në këtë drejtim. Nëse vendet anëtare kërkojnë diçka të tillë ne do të vendosim masat e nevojshme edhe kundër Serbisë nëse pra këto vende anëtare vlerësojnë se në kushtet dhe kontekstin aktual të krizës së fundit Serbia nuk po bën asgjë për të ulur tensionet”, ka thënë Stano.
Letra e nënshkruar nga dhjetë kryetarë të komisioneve për marrëdhënie me jashtë dhe 56 deputetë kërkon diplomaci parandaluese, baraspeshë dhe mospërsëritje të gabimeve të së kaluarës, ndërsa thekson mungesën e trysnisë ndaj Serbisë pas tensioneve në veri të Kosovës.