Një tërmet i lehtë me 2.6 shkallë të Rihterit, ka ndodhur 5 kilometra në veri të Pejës, gjatë të premtes, rreth orës 14:59, sipas Qendrës Sizmologjike Evropiane të Mesdheut (EMSC),
Për këtë termet ka reaguar drejtori ekzekutiv i Qendrës Kërkimore për Politika të Sigurisë (SPRC) dhe njohësi i çështjeve të emergjencave, Tahir Ahmeti, i cili ka thënë të ndjeken informatat zyrtare të lëshuara nga Instituti Sizmologjik i Kosovës, duke shmanguar panikun për rrezikun e mundshëm.
“Qytetarët e Kosovës dhe mediat në vend, duhet ndjekur informatat zyrtare të lëshuara nga Instituti Sizmologjik i Kosovës, duke shmangur panikun për rrezikun e mundshëm”, ka shkruar Ahmeti në Facebook.
Ndërsa, drejtori i Institutit Sizmologjik të Kosovës, Shemsi Mustafa ka thënë për Telegrafin se nuk ka vend për panik pasi tërmeti ishte i intensitetit të ultë.
“Në këto kohë tërmete të këtij intensiteti i kemi të shpeshta dhe nuk ka arsye për panik pasi nuk krijojnë dëme”, ka thënë Mustafa.
Mustafa tha më tej se bazuar në ligj e kanë të obligueshme që të lajmërojnë tërmetet kur janë mbi 3.5 shkallë të Rihterit.