Raportuesja për Kosovën në Parlamentin Evropian, Viola von Cramon, ka ngritur shqetësimin e saj në lidhje me takimin e presidentit serb, Aleksandër Vuçiq, me homologun ukrainas, Volodymyr Zelensky.
Ajo ka pretenduar se takimi kishte të bëjë kryesisht me ushtrimin e presionit mbi Ukrainën për ta furnizuar me armë, në këmbim të mosnjohjes së pavarësisë së Kosovës.
“Me të vërtetë: shumë e mundshme që Aleksandër Vuçiq është pajtuar të takohet me Volodymyr Zelensky, kryesisht për të ushtruar presion mbi Ukrainën: armë për mosnjohjen e Kosovës. Unë shpresoj që Zelensky kupton rrezikun politik që mund të ketë një marrëveshje e tillë. Pavarësia dhe stabiliteti i Kosovës janë gjithashtu në interesin e Ukrainës,” ka thënë Von Cramon në platformën X.
Vuçiq është takuar me Zelensky-n në Greqi, me të cilin, ka folur edhe për situatën në Kosovë.
Takimin me Zelenskyn, presidenti serb e ka cilësuar si të drejtë, të hapur, miqësor e konstruktiv.
Në një konferencë për media, përshtypja e Vuçiqit është se Ukraina nuk do të ketë ndonjë ndryshim pozicioni në raport me pavarësinë e Kosovës.
“Ia shpjegova situatën rreth Kosovës. Nuk mendoj se do të ketë ndonjë ndryshim në pozicionin e Ukrainës në lidhje me integritetin tonë territorial. Ne e mbështetëm Ukrainën në rrugën e saj evropiane”, ka thënë Vuçiq.
Ai ka shtuar se Greqia nuk do të ndryshojë qëndrimin për çështjen e Kosovës.
Ndryshe, deputeti ukrainas, Oleksiy Gonacharenko, ka deklaruar se shteti i tij Ukraina duhet ta njohë pavarësinë e Kosovës.
Këtë deklaratë Gonacharenko e bëri pas takimit të presidentit të Ukrainës, Volodymyr Zelensky me presidentin e Serbisë, Aleksandër Vuçiq.
Deputeti ukrainas ka thënë se duhet të ketë takime Ukrainë – Serbi, por sipas tij, duhet të kihet kujdes, pasi Serbia është aleate e Rusisë.