Policia e Kosovës ka arrestuar dy persona për shkak se dyshohet se të njëjtit kanë kryer veprat penale “Keqpërdorim të pozitës apo autoritetit zyrtar” dhe “Keqpërdorim dhe mashtrim me prokurim publik”.
Në njoftimin e policisë thuhet se dy të dyshuarit janë me inicialet, E.SH dhe B.K.
“Të njëjtit në cilësi të personave zyrtar kanë qenë të caktuar për menaxhim dhe mbikëqyrje të kontratës për ndërtimin e disa rrugëve në një fshat të komunës së Suharekës në vitin 2022, ku vlera e kësaj kontrate ka qenë dhjetëra mijë euro”, thuhet në njoftim.
Ndër të tjera thuhet se pas daljes së prokurorit në vendngjarje dhe ekspertëve kompetentë e verifikimit të gjendjes faktike si dhe intervistimit të dëshmitarëve, lidhur me ketë kontratë është konstatuar se e njëjta nuk është realizuar siç ka qenë e paraparë.
“Të dyshuarit kanë përpiluar procesverbale dhe situacione fiktive/rrejshme ku kanë konfirmuar kryerjen e punimeve sipas kontratës, ndërsa sipas gjendjes në teren kjo kontratë nuk është realizuar”, thuhet tutje.
Lidhur me rastin janë intervistuar të dyshuarit e lartcekur me iniciale në prezencë të avokatit mbrojtës, ku pas përfundimit, sigurimit të provave dhe dëshmive me vendim të prokurorit të dyshuarit janë dërguar në mbajtje për 48 orë.