Informacionin e pranuan nga Agjencia e Intelegjencës ndërsa bastisjen në Zveçan e organizuan vetë.
Çka u gjetë gjatë aksionit të Policisë së Kosovë në një shtëpi të pa-banueshme u prezantuan në Stacionin Rajonal në Veri.
Rezultati është ky: katër armë automatike, dhjetëra karikatorë, qindra plumba të kalibrave të ndryshëm, lëndë shpërthyese, granata dore, mjete të mprehta, veshje e çanta për mbajtje të armatimit.
Duke pasur për bazë sasinë e tij, zëvendësdrejtori rajon i Policisë nuk e përjashton mundësinë që shtëpia të ketë qenë në shërbim si depo.
“Ne nuk kemi të arrestuar për momentin por kemi persona të dyshimtë. Aty në mesin e armënve dhe municionit që ju i patë kishte edhe kallashnikovë po e zëmë edhe municion 5×56 që i bie kalibër i NATO-s”, ka deklaruar Veton Elshani, Zëvendësdrejtor i Drejtorisë Rajonale në veri.
Për arsenalin e armëve të gjetur në Zveçan ka reaguar edhe Ministri i Brendshëm, Xhelal Sveçla.
Shtëpia e pabanueshme, sipas Sveçlës ka shërbyer si bazë e armatimit, dhe është përdorur për grumbullim dhe shpërndarje të armatimit për grupet kriminale.
Por, Sveçla ka pranuar një kërcënim me jetë në postimin përmes të cilit njoftoi për konfiskimin e armëve.
“Unë personalisht do të të dënoj, (likuidoj), vetëm momenti pritet”, thuhet në kërcënimin e bërë nga një profil që mban emrin e organizatës së shpallur terroriste, “Brigada e Veriut”.
Në vendin e bastisjes përpos institucioneve vendore të sigurisë, kanë qenë të pranishëm edhe përfaqësues të KFOR-it.