Vajza e Hysen Gucatit ish-kreut të OVL-UÇK-së, Ariana Gucati është shprehur optimiste se babai i saj do të shpallet i pafajshëm.
Ajo ka thënë se bashkë me familjen e saj, janë duke e pritur lajmin për lirimin e Gucatit.
Sipas saj, edhe pritja e avokatëve është poizitve.
“Ne si familje jemi të emocionuar dhe jemi optimistë që drejtësia ta marrë vendimin e duhur që të gjithë së bashku të kthehen në vendin e tyre. Personalisht sot nuk kam biseduar, por, që nga fillimi kanë qenë të bindur për pafajësinë e tyre. Edhe pritja e avokatëve është pozitive dhe besojmë sikurse ta edhe ne besojmë se gjykimi është i drejtë”, ka deklaruar ajo.
Familjarë, shokë e bashkëluftëtarë të Hysni Gucatit po qëndrojnë te shtëpia e tij, të cilët kanë thënë se po presin që ish-kryetari i OVL UÇK-së dhe ish-luftëtari i Ushtrisë Çlirimtare të Kosovës të lirohet të mërkurën.
Në aktakuzën që rëndon Hysni Gucatin dhe Nasim Haradinajn thuhet se midis 7 dhe 25 shtatorit 2020, në tri konferenca për shtyp dhe transmetime të tjera televizive, si dhe përmes shpërndarjes së mëtejshme, Hysni Gucati dhe Nasim Haradinaj zbuluan, pa autorizim, informacione të mbrojtura nga Ligji për Dhomat e Specializuara dhe Zyra e Prokurorit të Specializuar, përfshirë të dhëna personale të disa dëshmitarëve (të mundshëm).