Presidenti i Malit të Zi, Milo Gjukanoviq në konferencën për media ka thënë se Mali i Zi e mbështet Kosovën në aplikimin e saj për anëtarësim në Këshillin e Evropës duke thënë se Evropa duhet të përsërisë mesazhin që të gjitha vendet e Ballkanit Perëndimor të kenë vend në BE.
”Anëtarësimi i Ballkanit në BE do të ishte investim i shkëlqyer. Ngjarjet në Ukrainë janë momente që na kanë zgjuar neve në Evropë dhe që në Ukrainë nuk është goditur vetëm pavarësia, por edhe sistemi i vlerave evropiane. Ka ardhur koha që Evropa të përsërisë mesazhin, që të gjitha vendet e Ballkanit Perëndimor e kanë vendin në BE. Presim që në këtë moment dhe kohën e ardhshme të kemi të ripërtrirë procedurën e integrimit”, tha presidenti malazez, transmeton PortaliD.
Ai shton se Mali i Zi si anëtare e fundit në Këshillin e Evropës ka zbatuar reforma të shumta dhe pret që në të njëjtin drejtim ta sheh dhe Kosovën.
”Është treguar qartë qëndrimi ynë që Kosova të integrohet. Është organizata më e vjetër pan evropiane (Këshilli i Evropës). Ne si anëtarja e fundit e kemi shfrytëzuar shumë mirë dhe kemi zbatuar reforma të shumta. Në këtë drejtim e shohim edhe aplikacionin e Kosovës dhe është e logjikshme që e mbështesim atë’’, tha ndër të tjerash Gjukanoviq.
Ndërkaq, sa i përket iniciativës së Ballkanit të hapur, presidenti malazez tha se nuk janë pjesë e saj, pasi sipas tij ‘’Open Ballkan’’ ka rrjedhur në një moment të depresionit në rajon, kur e ka përfunduar mandatin kancelarja gjermane, Angela Merkel dhe është vënë në pikëpyetje integrimi evropian.
Më 12 maj, Ministrja e Punëve të Jashtme dhe Diasporës, Donika Gërvalla e ka dorëzuar aplikimin e Kosovës për anëtarësimin e saj në Këshillin e Evropës.
Këshilli i Evropës është një organizatë e shteteve evropiane, e themeluar më pesë maj 1949, për të arritur një bashkim më të madh midis vendeve anëtare mbi bazën e traditave të tyre të përbashkëta të lirisë politike.