Ministri i Infrastrukturës, Liburn Aliu, ka komentuar dëshminë e raportuesit të Human Rights Watch, kundër ish-krerëve të Ushtrisë Çlirimtare të Kosovës, të cilët po akuzohen në Dhomat e Specializuara të Hagës.
Ai ka theksuar se është tmerruese kur raportet e shërbimeve dhe të mediave serbe të konsiderohen si fakte nga një organizatë kaq e njohur botërore si Human Rights Watch, për të akuzuar UÇK-në.
Këto raporte, ministri i ka quajtur tendencioze dhe të pasakta.
“Të gjithë ata që kanë ndjekur zhvillimet e ditëve të fundit në Hagë, kanë mundur të shohin e të dëgjojnë se sa të pasakta e tendencioze kanë qenë disa raporte që janë marrë si dëshmi e janë përdorur për të akuzuar UÇK-në. Është tmerruese kur e mendon se si raportet e shërbimeve dhe mediave serbe kanë arritur të ndikojnë dhe të konsiderohen si fakte nga një organizatë kaq e njohur botërore si Human Rights Watch”.
“Pra, qëndrimet e dala nga aparati i Serbisë – i cili deri në atë kohë qe pushtues herë represiv e herë opresiv, por që edhe sot e kësaj dite ka për synim shtypjen e shqiptarëve në Luginë dhe njëherit bllokimin e Kosovës – janë publikuar nga HRË, fatkeqësisht pa bërë as verifikimet e duhura në terren. Së paku kështu po del nga dëshmia e deritanishme e dëshmitarit të prokurorisë në Hagë Frederic Abrahams! Dhe këto të dhëna po i përdor Prokuroria si bazë për ngritjen e aktakuzave për krime”, shkroi Aliu.
Ai potencon bindjen e tij se duhet të ketë drejtësi për çdo viktimë të krimit, pavarësisht etnisë, e po aq i bindur shprehet se UÇK-ja do të dalë plotësisht e pafajshme “pavarësisht se sa ka qenë dhe mbetet cak i fushatave shpifëse nga sistemi antishqiptar millosheviqian, e tash edhe nga pasardhësit e tyre”.
Sipas tij, lufta çlirimtare e Kosovës ka qenë e drejtë dhe e pashmangshme, teksa shton thirrjen që sa më shpejt të pranohet ky fakt, aq më shpejt do të krijohen kushtet për fqinjësi e bashkëjetesë të qëndrueshme e paqësore në rajon.
“Kjo nuk është çështje opinionesh, ashtu siç nuk kanë qenë çështje opinionesh shtypja, diskriminimi, përbuzja racore, përndjekja e burgosja politike, dhe në fund edhe spastrimi etnik që Serbia e ka ushtruar kundër Shqiptarëve përgjatë gjithë shekullit XX”, shtoi më tej ministri Aliu.