Kuvendi komunal i Leposaviqit ka votuar pro anëtarësimit të kësaj komune në Asociacionin e Komunave të Kosovës.
Leposaviqi këtë vendim e ka marrë në një seancë të mbajtur të enjten.
Kjo është bërë e ditur nga nënkryetari i Vetëvendosjes në Mitrovicë të Veriut, Alban Uka.
“Në këto momente në Kuvendin Komunal të Leposaviqit përmes votimit pa asnjë kundërshtim u votua që Komuna e Leposaviqit t’i bashkohet Asociacionit të Komunave të Kosovës! Na priftë e mbara!”, ka shkruar Uka në rrjetin social Facebook.
Sipas procedurave, vendimi i kuvendit komunal do të dërgohet në Ministrinë e Administrimit të Pushtetit Lokal, për vlerësim të ligjshmërisë dhe pastaj pritet të dërgohet tek Asociacioni i Komunave të Kosovës për shqyrtim.
Përndryshe, komuna e Mitrovicës së Veriut, të martën e 22 gushtit, është pranuar në Asociacionin e Komunave të Kosovës (AKK) me votim unanim.