Malet që lidhin Zveçanin e Leposaviqin, po kontrollohen detajisht nga Policia e Kosovës.
Për ta kryer këtë punë, është aktivizuar njësiti K-9.
Në asistencë u kanë dalur gjatë ditës edhe helikopterë të KFOR-it.
Në këto hapësira që ndodhen përreth Manastirt të Banjkës u gjet trupi i pajetë i njërit prej pjesëtarëve të grupit terrorist.
Deri tash, ai është bërë i vdekuri i tretë i grupit kriminal.
Përveç maleve, kontrolle të detajizuara u kryen edhe nëpër rrugë, shtëpi e ambiente të tjera në afërsi të manastirit.
Ekipet e forenzikës e ato të mjekësisë ligjore mbërritën që në mëngjes në Manastir, për të vazhduar punën nga nata e kaluar.
Në vendin e ngjarjes ato bashkë me njësite të tjera të Policisë kishin mjaft punë, një pjesë e së cilës u prezantua në kampin e Njësisë Speciale në Mitrovicë, “Enver Zymberi”.
Gjatë ditës në afërsi të manastirit është gjetur edhe një veturë përplot armatim.
Informacionin e ka konfirmuar prokurori i rastit, Naim Abazi.
E gjatë pasdites, nga manastiri u largua ekipi i peligrinazhit, i cili dyshohet se u mbajt i ngujuar nga grupi terrorist.
Përcjelljen e tyre deri në kufi me Serbinë, e kryen disa vetura të EULEX-it.