Qendra Kinematografike e Kosovës ka njoftuar se nuk do të ketë asnjë propozim filmi për edicionin e “Oscars 2024”.
“Pas konsiderimit të detajshëm të aplikimeve të këti viti, komiteti selektues ka konstatuar se veprat në konkurrencë deshmojnë prezencë të talentit vibrant, kërkues e provokativ në ardhje, por që nuk reflektojnë mjaftueshëm standardin e prurjeve të deritanishme në kinematografi. Si rezultat i kësaj, krahas sukseseve të vazhdueshme të filmave, komiteti ka vendosur unanimisht që në edicionin e Oscars 2024 të mos dërgojë përfaqësues nga Kosova”, thuhet në njoftimin e QKK-së.
Ndryshe,Qendra Kinematografike e Kosovës me 19 korrik ka hapur thirrjen për përzgjedhjen e filmit që do të përfaqësojë Kosovën në edicionin e 96-të të çmimeve OSCARS, në kategorinë për film ndërkombëtar/gjuhë të huaj.
“Në këtë kategori përfshihen filmat e metrazhit të gjatë artistik, dokumentarë dhe të animuar më të gjatë se 40 minuta, që janë shfaqur/do të shfaqen në kinema, apo VOD platformë, për më së paku 7 ditë radhazi, jo më herët se 1 dhjetor 2022 dhe jo më vonë se 31 tetor 2023”- thuhet në njoftim.
Nga 2014, Kosova fitoi të drejtën për të përzgjedhur një film për garën e çmimeve OSCARS në kategorinë e filmit të huaj.
Suksesi më i madh kinematografik i Kosovës mbetet nominimi i filmit të shkurtër britaniko-kosovar “Shok” në kategorinë “Best Live Action Short”, në OSCARS më 2016.