Kryeministri i Kosovës, Albin Kurti, ka thënë se se sulmi i së dielës (së 24 shtatorit) në veri të Kosovës nuk ishte “rezistencë civile apo vepër e bandave”, por sulm i “formacioneve të armatosura paraushtarake të pajisura dhe përgatitur nga Beogradi” dhe që “u krye me urdhër të Serbisë”.
Kurti në një intervistë për Al Jazeera ka thënë se nuk përjashtohet mundësia e një agresioni tjetër mbi territorin e Kosovës, duke theksuar se presidenti serb, Aleksandë Vuçiq të dielën e 24 shtatorit deshi “një luftë tjetër dhe një gjenocid, sepse dëshiron Republikën Srpska në Kosovë”.
Ai ka akuzuar Beogradin dhe grupet e armatosura se duan të përsërisin skenarin e fillimit të luftës në Sarajevë.
Kurti po ashtu ka thënë se Vuçiq dhe nënkryetari i Listës Serbe, Milan Radoiçiq, i cili ka marrë përgjegjësinë për sulmin në veri të Kosovës, janë “Slobodan Millosheviq dhe Zheljko Raznatoviq Arkan” të cilët siç ai deklaroi, dëshiron ta kthejnë rajonin në vitet e 90-ta, duke shtuar dhe se “grupet paramilitare” në Kosovë janë të lidhura edhe me grupe nga Rusia, si Wagner, duke i quajtur Vuçiqin dhe Radojçiqin “Putin dhe Prigozhin”.
“Ashtu siç Rusia zhvilloi një luftë hibride në Ukrainë në fillim, Serbia po bën kundër nesh”.