Kryeministri i Kosovës, Albin Kurti në mbledhjen e Këshillit të Përgjithshëm të Lëvizjes Vetëvendosje ka thënë se që nga 24 shtatori, asgjë më nuk është e njëjtë.
“Prej së dielës që lamë pas, asgjë më nuk është e njëjtë. Faktet dolën sheshazi dhe ajo që e kemi thënë nga hera se Serbia po e sponzoron terrorizmin në veri u qartësua dhe u vërtetua për të gjithë”, ka thënë Kurti.
Kreu i ekzekutivit ka treguar se Policia e Kosovës përveq që ka vendosur paqen dhe sigurinë në veri, po ashtu ka shpërndarë dhe pako ushqimore për qytetarët serbë në Banjskë të Zveçanit.
“Policia e Kosovës, tashmë ka vendosur paqen dhe sigurinë në pjesën veriore të vendit tonë. Gjersa po vazhdon me operacionin anti-terror, ajo ka shpërndarë mbi 100 pako ushqimore që plotësojnë nevojat bazike të banorëve serbë që jetojnë në Banjskë”, ka thënë Kurti.
“Sot një javë Afrim Bunjaku, heroi i Republikës sonë ishte ende me ne. Në mëngjesin e ditës së nesërme bëhet një javë që rreshter Afrimi u vra në pritë nga sulmi terrorist. Të dielën që shkoj grupet kriminale terroriste që i kemi luftuar për dy vjet e gjysmë, të riorganizuar dhe të mbështetur nga Serbia cenuan integritetin territorial, sovranitetin shtetëror dhe sigurinë tonë kombëtare. E filluan duke bllokuar rrugën e fshatit Banjskë në Zveçan me mjete të rënda e më pas tinëzisht qëlluan mbi Policinë e Kosovës për ta jetësuar planin e tyre të gjakderdhjes”, ka thënë ai.
Kurti ka kujtuar se nga ky sulm u vra rreshteri Afrim Bunjaku dhe u plagos zyrtari policor, Alban Rashiti.
Ndërsa nga aksioni policor, Kurti ka theksuar se kanë gjetur armatim me vlerë më shumë se 5 milionë eurosh dhe sasi armatimi për qindra luftëtar, që sipas tij dëshmon për “planin e fillimit të një lufte të armatosur brenda dhe kundër Republikës së Kosovës”.