Presidentja e Kosovës, Vjosa Osmani, në një intervistë për “La Republica” ka folur për zhvillimet e fundit në veri të Kosovës dhe dislokimin e forcave ushtarake serbe pranë kufirit me Kosovën.
Osmani duke folur për sulmin terrorist të 24 shtatorit në Banjskë të Zveçanit ka thënë se presidentin serb, Aleksandër Vuçiq, përmes armëve ruse po mendon aneksin e Kosovës, sipas modelit të Krimesë.
“Ka prova të pakundërshtueshme. Serbia ka kryer një akt agresioni më 24 dhe po përgatitet të kryejë një akt tjetër duke forcuar forcat e armatosura dhe artilerinë në kufirin me Kosovën. Është diçka ndryshe nga ajo që kemi parë në 25 vitet e fundit, e paprecedentë”, ka thënë Osmani.
Më tej ajo ka shtuar se “Serbia duhet ta dijë se do të përballet me një popull të gatshëm për të mbrojtur lirinë me çdo kusht dhe këtë NATO është me ne”.
Kështu duke dislokuar trupa ushtruake përgjatë kufirit me Kosovën, përtej Atlantikut koordinatori për komunikime strategjike në Këshillin e Sigurisë Kombëtare të SHBA-së, John Kirby, të premten shprehu shqetësimin e Uashingtonit.
“…Ne po monitorojmë një dislokim të madh ushtarak serb përgjatë kufirit me Kosovën që përfshin një organizim të paprecedentë të artilerisë, tankeve dhe njësive të mekanizuara të këmbësorisë serbe”, ka thënë Kirby.
Uashingtoni zyrtar e cilësoi këtë si një zhvillim shumë destabilizues dhe i bëri thirrje Serbisë që të tërheqë forcat ushtarake nga kufiri dhe të ulë tensionet.
Ndërsa, nga Qeveria e Kosovës kanë thënë se lëvizjet e ushtrisë serbe janë bërë në tri drejtime.
“Lëvizjet e ushtrisë serbe janë bërë nga tre drejtime të ndryshme; njësitet e Brigadës së dytë të ushtrisë serbe kanë lëvizur nga drejtimi i Rashkës në drejtim të kufirit verior të vendit tonë; njësitë e Brigadës së Tretë të ushtrisë serbe kanë lëvizur nga Regjioni i Nishit në drejtim të kufirit veri-lindor të vendit tonë dhe njësitë e Brigadës së katërt kanë lëvizur nga Regjioni i Vranjës në drejtim të kufirit lindor të Republikës së Kosovës. Njësitë ushtarake të ushtrisë së Serbisë gjatë ditës së djeshme kanë vendosur kapacitetet e tyre ushtarake dhe të xhandarmërisë nëpër 48 bazat e përparme operacionale, që janë të shtrira përgjatë vijës kufitare me Republikën e Kosovës, pak kilometra në thellësi të territorit të Serbisë. Në këtë vendosje përfshihen edhe vendosja e sistemeve kundër-ajrore dhe artilerisë së rëndë.