Kryeministri i Kosovës, Albin Kurti, priti në ndërtesën e Qeverisë për një takim dypalësh ministrin gjerman të Ushqimit dhe Bujqësisë, Cem Özdemir, të shoqëruar nga stafi i tij dhe nga ambasadori gjerman në Republikën e Kosovës, Jörn Rohde.
Kryeministri Kurti e ka njoftuar ministrin Özdemir për zhvillimet politike të fundit në Kosovë, duke përfshirë sulmin terrorist të 24 shtatorit dhe hetimet që po kryhen në lidhje me të.
Ai gjatë takimit ka theksuar edhe faktet që dëshmojnë për lidhjen dhe përfshirjen e drejtpërdrejtë të shtetit të Serbisë në këtë sulm. Kryeministri gjithashtu e falënderoi Gjermaninë për rolin e rëndësishëm të ushtrisë gjermane Bundeswehr në KFOR.
Ndërkaq, gjatë takimit, sipas njoftimit të Zyrës së Kryeministrit, ata biseduan për marrëdhëniet dypalëshe diplomatike dhe ekonomike mes dy vendeve, si dhe për ndikimin pozitiv të diasporës së Kosovës në Gjermani.
Ministri gjerman Özdemir, e ka përgëzuar Qeverinë për reformat e ndërmarra, me theks ato në fushën e bujqësisë dhe zhvillimit rural e përmes së cilave Kosova ka dëshmuar përkushtimin e saj për anëtarësim në Bashkimin Evropian.
“Gjatë takimit, kryeministri e njoftoi ministrin Özdemir edhe për zhvillimet politike në vend, sulmin terrorist të 24 shtatorit, hetimet rreth tij, faktet që dëshmojnë për lidhjen dhe përfshirjen e drejtpërdrejtë të shtetit të Serbisë dhe për punën profesionale të Policisë së Kosovës.Për punën profesionale të Policisë u shpreh mirënjohës edhe ministri gjerman, i cili gjithashtu shprehu ngushëllime për policin e rënë në detyrë, Afrim Bunjaku, në ditën e sulmit terrorist”, thuhet në njoftimin e Zyrës së Kryeministrit.
Ministri gjerman, Özdemir të mërkurën gjatë gjithë ditës ka qëndruar për vizitë zyrtare në vend. Paraprakisht kishte zhvilluar edhe një takim me homologun e tij, ministrin e Bujqësisë, Pylltarisë dhe Zhvillimit Rural, Faton Peci, i cili bashkë me zëvendësministrin Imri Demelezi dhe Shefin e Stafit të Kryeministrit, Luan Dalipi ishin po ashtu të pranishëm në takimin e mbajtur në kryeministri.