Kryeministri i Republikës së Kosovës, Albin Kurti, është takuar me shefin e Zyrës së Bashkimit Evropian në Kosovë, njëherësh përfaqësues special i BE-së, Tomas Szunyog.
Zyra e Kryeministrit përmes një komunikate ka njoftuar se temë diskutimi ishte sulmi terrorist i datës 24 shtator ndaj Policisë së Kosovës si dhe Procesi i Berlinit.
“Sulmi terrorist, paramilitar dhe kriminal i 24 shtatorit ndaj Policisë së Kosovës, hetimet që po zhvillohen rreth synimeve dhe autorët e këtij sulmi, procesi i Berlinit në prag të samitit të radhës dhe përgatitjet e Raportit të Vendit, ishin temat kyçe të bisedës në takimin e sotëm”, thuhet në njoftimin e ZKM-së.
Tutje, në njoftim theksohet se ambasadori Szunyog i shprehu edhe një herë ngushëllime kryeministrit, familjes Bunjaku dhe popullit të Kosovës, për heroin e Kosovës, Afrim Bunjaku, rreshterin e Policisë i cili ra në detyrë, në mbrojtje të rendit, të ligjshmërisë, të kushtetutshmërisë, të sovranitetit shtetëror dhe të integritetit territorial.
“Ambasadori, më tej, e njoftoi kryeministrin Kurti për përgatitjet që Komisioni Evropian është duke i bërë në finalizimin e Raportit të Vendit për vitin 2023, i cili pritet të miratohet në pjesën e parë të muajit nëntor”, u tha më tej nga Zyra e Kryeministrit.