Kryeministri i vendit, Albin Kurti, ka refuzuar që t’u përgjigjet pyetjeve parlamentare të deputetëve të Kuvendit.
Kjo, sipas Kurtit, do të bëhet shkak i mosvotimit të marrëveshjeve ndërkombëtare.
“Për shkak se nuk po i votoni marrëveshjet ndërkombëtare, të gjithë deputetët që i bëjnë pyetjet, nuk do të kenë përgjigjet, edhe pse i kam tashmë të përgatitur. Duhet të jemi kolegë të të njëjtit shtet. E jemi të njëjtit shtet, nëse bëhet fjalë për mbrojtjen dhe përfaqësimin e interesit publik dhe shtetëror”, ka thënë Kurti në hollin e Kuvendit.
Ky reagim i Kurtit erdhi pasi deputetja e AAK-së, Time Kadrijaj, e pyeti kryeministrin se përse nuk po e njeh Greqia Kosovën ashtu siç pretendonte Kurti kohë më parë.
“Nga 377 marrëveshje ndërkombëtare që janë votuar ne i kemi votuar, vetëm tri prej tyre nuk i kemi përkrahur. Nuk mund të bësh pyetje parlamentare kryeministrit dhe ta dëmtosh shtetin në masën e përgjithshme 360 milionë euro nga një dyzinë marrëveshje ndërkombëtare”, ka thënë Kurti.
E për këtë reagoi deputetja e PDK-së, Ganimete Musliu, ku ka thënë “se është diktaturë që Qeveria t’u vendosë kushte të zgjedhurve të popullit”.
“Me ardhë Qeveria me na qit kushte në parlament, deputetëve të zgjedhur të popullit, kjo është diktaturë. Pyetjen e kam pasur për Xhelal Sveçlen pyetjen s’po e bëj, por po e ftoj të viëj nga kampi Belvedere dhe ta bindë këtë njeri këtu që t’i votojnë rekomandimet qe kanë dalë nga PDK-ja për Policinë e Kosovës. Mjaft më se u bëtë gaz”, është shprehur Musliu.