Avokati Tom Gashi, në “Debat Plus” në RTV Dukagjini, ka thënë se presidentja e Kosovës, Vjosa Osmani nuk i beson Prokurorisë.
“Presidentja Osmani ka deklaruar se ka marrë kërcënime, çfarëdo lloj që ato kanë qenë edhe për shkak të mosdekretimit të kandidatit të KPK-së. Këto kërcënime ka deklaruar ajo se nuk i ka deponuar ende sepse është e thjeshtë se nuk i beson këtij institucioni, respektivisht kësaj Prokurorie”, ka thënë Gashi.
Sipas Gashit, kjo situatë është tepër e rëndë dhe se nuk është normale që presidentja të merr kërcënime.
Gashi ka thënë tutje se këto kërcënime janë serioze.
Presidentja e Kosovës, Vjosa Osmani, nuk e ka dekretuar për kryeprokuror të shtetit, Blerim Isufajn, të martën e 17 tetorit.
Në një konferencë për media, Osmani ka thënë se këtë të martë e ka njoftuar Këshillin Prokurorial të Kosovës lidhur me këtë vlerësim të mos bëjë dekretimin e kandidatit të propozuar për kryeprokuror.
Lexo dhe: Osmani nuk e dekreton për kryeprokuror të shtetit, Blerim Isufajn
“Përgjegjësia ime për garantimin e funksionimit Kushtetues të institucioneve më obligon që ndaj një procesi të tillë që cenon rëndë parimet dhe vlerat fondamentale të Kushtetutës sonë, sikurse edhe prodhon padrejtësi konkrete dhe diskriminim të mos rri duarkryq. Sot e kam njoftuar Këshillin Prokurorial të Kosovës lidhur me këtë vlerësim, i cili duke pasur parasysh të gjitha shkeljet më obligon që të mos bëjë dekretimin e kandidatit të propozuar për kryeprokuror”, tha Osmani.