Kryeministri i vendit, Albin Kurti, ka thënë se Serbia është ajo e cila duhet të ndëshkohet nga ndërkombëtarët, jo Kosova.
Kurti ka theksuar se duhet ta kuptojnë të gjithë tashmë se kush është Serbia.
“Është jetike për Kosovën, për demokracinë që ata të cilët nuk e kanë ditur, ose nuk e kanë kuptuar se kush është Serbia dhe Beogradi zyrtar, më në fund ta bëjnë këtë, sepse nuk është Kosova ajo që duhet të ketë masa ndëshkuese, por është Serbia ajo së cilës duhet t’i vendosen sanksionet”, ka deklaruar Kurti.
Teksa ka folur për dialogun, Kurti ka potencuar se sa më shpejt që të zbatohet marrëveshja bazike e Brukselit do të ketë jo vetë normalizim, por edhe siguri për Kosovën dhe rajonin.
“Sa i përket dialogut në Bruksel, ne prej atje kemi marrëveshje, por që sërish për shkak të Serbisë nuk është zbatuar. Ne kemi qenë përherë konstruktivë, të përkushtuar, kreativë dhe kurrsesi nuk ka faje apo përgjegjësi në anën tonë pse Kosova dhe Serbia nuk i kanë marrëdhëniet normale. Marrëveshja bazike e Brukselit nga 27 shkurti e ka në qendër njohjen de-facto reciproke dhe sa më parë zbatohet ajo do të kemi jo vetë normalizim demokratik e evropian, por edhe siguri për vendin tonë e për rajonin”, ka theksuar ai.