Ministri i Punëve të Brendshme, Xhelal Sveçla, është takuar me Komandantin ri të KFOR, Gjeneralmajor Ozcan Ulutas.
Gjatë takimit, ata diskutuan për situatën e përgjithshme të sigurisë, në veçanti për atë në katër komunat veriore të Kosovës.
“Biseduam për situatën e përgjithshme të sigurisë dhe për sigurinë në katër komunat veriore të Republikës së Kosovës, veçanërisht pas sulmit terrorist të 24 shtatorit në Banjskë të Zveçanit ku mbeti i vrarë zyrtari policor Rreshter Afrim Bunjaku dhe dy zyrtarë të tjerë të plagosur”, ka njoftuar Svelça në Facebook.
Ai e ka falënderuar Komandantin Ulutas për mbështetjen dhe bashkëpunimin e vazhdueshëm të KFOR, për ngritjen e kapaciteteve të tyre si dhe për shtimin e patrullimeve të përbashkëta përgjatë brezit kufitar me Serbinë.
“Të dyja palët ndajmë qëllime të përbashkëta të garantimit të sigurisë, paqes dhe stabilitetit për qytetarët tanë në vendin tonë andaj do të punojmë bashkërisht në realizimin e këtij qëllimi”, shtoi ai.