Partia Demokratike e Kosovës (PDK) e ka dërguar në Gjykatën Kushtetuese Projektligjin për Investime të Qëndrueshme.
Kjo u konfirmua për “Betimin për Drejtësi”, nga ushtruesi i detyrës i sekretarit të Kuvendit, Arben Loshi dhe nga deputeti i PDK-së, Ferat Shala.
Ndryshe, më 19 tetor 2023, Kuvendi i Kosovës e miratoi në lexim të dytë Projektligjin për Investime të Qëndrueshme.
Afati për dorëzimin e kërkesës në Kushtetuese, sipas Nenit 113.5 të Kushtetutës së Kosovës, parashtrohet brenda një afati prej tetë ditësh nga dita e miratimit të ligjit ose të vendimit të caktuar.
Sipas Ligjit për Gjykatën Kushtetuese, projektligji nuk procedohet nga ana e Kuvendit për shpallje te presidentja e Republikës së Kosovës, derisa për të nuk ka vendim përfundimtar nga ana e Gjykatës.