Vizita po, edhe pritje e takime të rëndësishme, por masat ndëshkuese të BE-së për shtetin e tyre janë akoma aty.
Bëhet fjalë për Kryeministrin Kurti që një ditë më parë u prit nga presidenti i Francës Macron.
Ndërsa presidentes Vjosa Osmani, por edhe kryeministrit, javën e kaluar u erdhi si mysafire presidentja e Komisionit Evropian, Ursula von der Leyen.
Sanksionet që iu vendosen Kosovës pati zëra se përfshijnë edhe mospritjen e krerëve shtetërorë nëpër qendra evropiane, por një gjë e tillë nuk ndodhi.
Bile, kjo as s’do të ndodhë, sipas njohësit të integrimeve evropiane Visar Xani.
Ai thotë se masat ndaj Kosovës nuk janë klasike dhe nuk përfshijë izolimin e liderëve të shtetit.
“Po shohim takime diplomatike që janë edhe në interes të shteteve të tjera, dhe të cilat kontribuojnë, në zbatimin e marrëveshjes ose përmbylljes së marrëveshjes së Brukselit. Prandaj takimet në frymë pozitive, që kanë për aspekt avancimin e çështjes së dialogut, sigurisht që nuk mund të izolohet Kosova, për shkak se pastaj s’mund të ketë veprime që e arrijnë qëllimin e BE-së, dhe qëllimin e Kosovës”, ka thënë Xani.
Përderisa profesori i marrëdhënieve ndërkombëtare, Dorajet Imeri vlerëson se politika e shteteve të mëdha ndryshon vazhdimisht, ai thotë se Kosova duhet të mbajë tempon e një pozicioni adekuat ndërkombëtarisht.
“Duhet kuptuar që pozicionet politike të shteteve janë përherë në lëvizje, në kuptimin e afirmimit, rëndësisë dhe, prezencës që ata kanë, nëpër forume të rëndësishme ndërkombëtare, qoftë dypalëshe ose shumëpalëshe….
Kosova duhet të luftojë vazhdimisht, që ta forcojë pozicionin e saj ndërkombvëtar,kjo ëahtë diqka që duhet të ndodhënë të gjitha nivelet”, ka thënë Imeri.
Përndryshe sipas zyrës së kryeministrit, Kurti pritet të ketë nesër takime të rëndësishme me përfaqësues të vendeve evropiane në margjinat e takimit në Francë, teksa nuk dihet nëse do të ketë ndonjë takim me presidentin e Serbisë, Aleksandar Vuçiq, i cili po ashtu gjendet në Paris.