Ish-ministri për Komunitete dhe Kthim në Qeverinë e Kosovës, Slavisha Petkoviq, ka thënë sot se në dhjetë vitet e fundit rreth 40 mijë serbë janë larguar nga Kosova.
“Përqindja më e madhe e serbëve nga veriu u larguan në dhjetë vitet e fundit qëkur Vuçiq erdhi në pushtet dhe vendosi të ashtuquajturën Listë Serbe në Kosovë, e cila mori përsipër gjithçka, u bë zotëruesi absolut i jetës dhe vdekjes kur serbët ishin të shqetësuar. Me ndihmën e gjithanshme të Prishtinës dhe me ndihmën e Listës Serbe dhe politikës së udhëhequr nga Aleksandar Vuçiq, pothuajse 40 mijë serbë janë shpërngulur në 10 vitet e fundit”, ka thënë Petkoviq, transmeton Radio Kim.
Petkoviq tha se në emigrimin e serbëve ka ndikuar edhe vrasja e dy kandidatëve për kryetar të Mitrovicës së Veriut, Dimitrije Janiqijeviq dhe Oliver Ivanoviq.
Ai ka vlerësuar se procesi i njohjes së pavarësisë së Kosovës ka filluar pas nënshkrimit të Marrëveshjes së Brukselit.
“Në fakt, është një proces i rrumbullakosjes së pavarësisë së brendshme për të ardhur më vonë tek ajo që Von der Leyen tha në Beograd se Serbia duhet aë njohë de fakto pavarësinë e Kosovës. Thjesht, një pjesë e serbëve nuk kanë dashur ta pranojnë këtë, nuk do të jetojnë në Kosovën e pavarur dhe për këtë po largohen. Arsyeja e dytë është e përhershme, gjatë gjithë këtyre viteve: presionet, djegia e makinave serbe nga serbët në veri, hedhja e bombave ndaj serbëve, vrasja e Janiçijeviqit, vrasja e Ivanoviqit… Të gjitha këto ngjallën frikë, veçanërisht te serbët në veri”, tha. Petkoviq./Danas