Kryetari i Kuvendit të Kosovës, Glauk Konjufca, denoncoi sot në Budapest përfshirjen e Serbisë në sulmin terrorist në Banjskë të Kosovës në shtator të këtij viti dhe njëherësh i bëri thirrje Bashkimit Evropian të ushtrojë më shumë presion ndaj Serbisë në procesin e normalizimit të marrëdhënieve me Kosovën.
Ai, në punimet e Konferencës së 11-të të kryetarëve të parlamenteve të shteteve të Evropës Juglindore “Procesi i integrimit evropian të vendeve të Evropës Juglindore”, potencoi rëndësinë e unitetit evropian kundrejt rreziqeve që rajoni dhe Evropa po përballet këto kohë, kur agresioni rus në Ukrainë po vazhdon, sikurse edhe përpjekjet për të përhapur vatra të reja konflikti dhe krize.
Konjufca theksoi se është thelbësore që në kuadër të procesit të normalizimit të marrëdhënieve Kosovë-Serbi, duhet të jetë njohja reciproke si dy subjekte sovrane dhe të pavarura, ashtu edhe siç përcaktohet në marrëveshjen e Brukselit.
Ai theksoi progresin që Kosova ka bërë në procesin integrues, përmes një plani kombëtar reformash integruese, ku Kuvendi i Kosovës ka luajtur rol krucial në miratimin, ndryshimin dhe plotësimin e një game të gjerë ligjesh dhe ristrukturimesh të kuadrit institucional në përputhje me kërkesat e BE-së.
“Në fjalën time para pjesëmarrësve të kësaj konference theksova rëndësinë e unitetit paneuropian kundrejt rreziqeve që rajoni ynë dhe Evropa në përgjithësi po përballet këto kohë, kur agresioni rus në Ukrainë po vazhdon, sikurse edhe përpjekjet për të përhapur vatra të reja konflikti dhe krize. Në këtë kontekst, denoncova edhe një herë përfshirjen e Serbisë në sulmin terrorist në Banjskë të Kosovës në shtator të këtij viti dhe njëherësh i bëra thirrje Bashkimit Evropian të ushtrojë më shumë presion ndaj Serbisë në procesin e normalizimit të marrëdhënieve me Kosovën, thelbi i të cilit normalizim duhet të jetë njohja reciproke si dy subjekte sovrane dhe të pavarura, ashtu edhe siç përcaktohet në Marrëveshjen e Brukselit”, ka shkruar Konjufca në Facebook.