Zëvendëskryeministri i parë për Integrim Evropian, Zhvillim dhe Dialog i Kosovës, Besnik Bislimi, ka pritur në takim ambasadorin e Mbretërisë së Bashkuar në Kosovë, Nicholas Abbott.
Siç ka njoftuar Zyra e Kryeministrit, gjatë takimit kanë biseduar mbi situatën e sigurisë në vend e ku është theksuar edhe kontributi i kontingjentit britanik brenda KFOR-it.
Zëvendëskryeministri Bislimi e ka njoftuar ambasadorin Abbott edhe mbi takimin e fundit të mbajtur në Bruksel në nivel të kryenegociatorëve dhe procesin e dialogut.
Ai ka theksuar se Republika e Kosovës vazhdon të mbetet konstruktive e aktive në proces, e përkushtuar për normalizimin e plotë të marrëdhënieve dhe për njohje reciproke.
“Republika e Kosovës dhe Mbretëria e Bashkuar ndajnë një miqësi e partneritet të fuqishëm”, thuhet në njoftim.
Zëvendëskryeministri Bislimi e ka falënderuar ambasadorin Abbott për takimin e frytshëm, si dhe ka shprehur mirënjohjen për bashkëpunimin e mbështetjen e vazhdueshme të Mbretërisë së Bashkuar ndaj Kosovës.