Zëvendëskryeministrja dhe ministrja e Punëve të Jashtme, Donika Gërvalla-Schwarz, priti të premten në takim dypalësh homologen belge, Hadja Lahbib.
Në komunikatën për media nga MPJD-ja thuhet se temë diskutimi në takim ishin rritja e bashkëpunimit ekonomik, e integrimit euroatlantik të Kosovës në prag të presidencës belge të Këshillit të Bashkimit Evropian, situata e sigurisë në rajonin e Ballkanit Perëndimor dhe rëndësia e vazhdimit të mbështetjes së shtetit belg mbi anëtarësimin e plotë dhe të barabartë të Kosovës në Këshillin e Evropës.
Në kuadër të këtij takimi, të dy bashkëbisedueset vlerësuan bashkëpunimin e shkëlqyeshëm në mes të dy vendeve, teksa theksuan përkushtimin dhe vullnetin e dyanshëm për ngritjen e këtij bashkëpunimi në një nivel edhe më të lartë në fushat e interesit të përbashkët.
“Ministrja Gërvalla i shprehi mirënjohje homologes belge për ngritjen e nivelit të përfaqësimit diplomatik në nivel Ambasade nga shteti belg në Republikën e Kosovës duke theksuar se kjo është dëshmi e thellimit të mëtutjeshëm të bashkëpunimit në mes të dy vendeve. Si një urë lidhëse shumë e rëndësishme në përafrimin në mes dy vendeve dhe dy popujve është vlerësuar edhe roli i diasporës kosovare, e cila jeton në shtetin belg”, thuhet në njoftim.