Zëdhënësja e LDK-së, Sibel Halimi, e ka kritikuar ministrin Liburn Aliu, për deklaratën e dhënë, ku kishte thënë se është ministër i një shteti të përkohshëm.
Sipas Halimit, me këtë deklaratë, ministri Aliu e ka shkelur betimin e tij si ministër dhe se në një shtet modern ai do të shkarkohej.
“Deklarata e Liburn Aliu nën betim si ministër, se Kosova na qenka projekt i përkohshëm, së pari shkel betimin që në secilin shtet modern do të pasohej me shkarkim, së dyti ndjellë pabesi e indiferencë ndaj rendit kushtetues dhe simbolik të shtetit kosovar”, tha ajo.
“Ministri Aliu paguhet nga taksat e qytetarëve për t’i dhënë shtetit besnikëri në shërbim, një qasje e tillë është më e dëmshme se të gjitha mosveprimet e tij, tash e tre vite në qeverisje”, vijoi ajo.
Halimi tutje tha se ministri Aliu duhet të kërkojë falje, sepse, sipas saj, e ka “lënduar projektin për të cilin u flijuan shumë breza”.
“Kjo është edhe e vërteta e kësaj qeverie, nuk e duan shtetin por pushtetin, duke i vjedhur të sotmen dhe të ardhmen, prandaj Liburn Aliu, duhet të kërkoj falje, sepse ka lënduar projektin për të cilin u flijuan shumë breza”, tha ajo.
“Bashkimi kombëtar”, Aliu: Jam ministër i një shteti të përkohshëm