Deputetja e Partisë Demokratike të Kosovës (PDK), Ganimete Musliu, ka kritikuar presidenten Vjosa Osmani për mospërmendjen e emrit të ish-presidentit Hashim Thaçi në fjalimin e saj vjetor në Kuvendin e Kosovës.
Musliu ka akuzuar Osmanin për injorancë dhe urrejtje patetike, duke e karakterizuar si një “grua të llastuar”.
Në një postim të saj në Facebook, Musliu ka thënë se mospërmendja e emrit të Thaçit në kontekstin e historisë së Pavarësisë së Kosovës është një tregues i mungesës së njohurive dhe një shprehje e urrejtjes së vazhdueshme ndaj një periudhe të lavdishme të historisë së vendit.
Deputetja e PDK-së, gjithashtu, ka thënë se kjo është arsyeja pse ajo nuk ka qenë pjesëmarrëse në fjalimin e presidentes Osmani, duke e cilësuar atë si një grua që nuk mund të shërohet nga urrejtja patetike ndaj një periudhe të njohur të historisë së Kosovës.
“Vjosa Osmani edhe sot e dëshmoj që nuk mund të jetë më shumë se një Vjosë. Kur flitet për historinë e Kosovës e nuk përmendet emri i Presidentit qe shpalli Pavarësinë e Kosovës, Presidentit Hashim Thaçi, kjo tregon injorancën dhe urrejtjen patetike të një gruaje të llastuar si Vjosa. Prandaj unë sot nuk bojkotova adresimin e Presidentit te shtetit tim, bojkotova fjalimin e një gruaje qe nuk mund të shërohet nga urrejtja patetike ndaj një epoke te lavdishme të historisë”, ka shkruar ajo.
Presidentja e Kosovës, Vjosa Osmani, teksa ka komentuar bojkotin e fjalimit të saj vjetor nga deputetët e PDK-së dhe të AAK-së duke theksuar se i ka kryer detyrat e saj si presidente dhe se dera e saj është gjithmonë e hapur për interesat qytetare dhe nacionale.
Ajo u është përgjigjur kritikave të opozitës duke thënë se as ata vetë nuk u besojnë atyre që kanë shkruar për fjalimin e saj.
Osmani tutje ka thënë edhe se Gjykata Kushtetuese vendos nëse draft-statuti i Asociacionit ka ndonjë shkelje.