Ministri i Punëve të Jashtme të Maqedonisë së Veriut, Bujar Osmani, ndodhet për vizitë zyrtare në Kiev për të realizuar takim me homologun e tij, Dmytro Kuleba dhe përfaqësues të lartë shtetërorë nga Ukraina, njofton Ministria e Punëve të Jashtme e Maqedonisë së Veriut.
Në këto takime është paraparë që ministrat të diskutojnë për agresionin ushtarak rus dhe mënyrat se si bashkësitë ndërkombëtare mund të ndihmojnë Ukrainën, duke përfshirë edhe Maqedoninë e Veriut.
Në njoftimin e Ministrisë së Punëve të Jashtme të Maqedonisë së Veriut, thuhet se Osmani është pritur nga Ambasadori i Republikës së Maqedonisë së Veriut, Krum Efremov.
Efremov është kthyer në kryeqytetin e Ukrainës, në Kiev dhe së bashku me anëtarët e tjerë të misionit diplomatik vazhdon ta kryejë funksionin e tij.