Presidentja e Kosovës, Vjosa Osmani, ka pritur në takim sekretaren parlamentare të shtetit në Ministrinë Federale të Mbrojtjes të Gjermanisë, Siemtje Möller.
Në këtë takim është diskutuar për zhvillimet e fundit në vend dhe rajon, sfidat e sigurisë në rajon, si dhe për procesin e dialogut.
“Në takim u diskutua edhe për integrimin e Kosovës në institucione ndërkombëtare, përfshirë Këshillin e Evropës, si dhe anëtarësimin në NATO, prandaj u theksua ndikimi dhe roli shumë i rëndësishëm i Republikës Federale të Gjermanisë në këto institucione”, ka njoftuar Presidenca.
Në këtë takim, Osmani ka shprehur falënderimin për përkrahjen e Gjermanisë, Ministrisë së Mbrojtjes dhe forcave gjermane ndaj Kosovës në rindërtimin, pavarësinë, shtetndërtimin, zhvillimin dhe forcimin e Kosovës dhe institucioneve të saj të mbrojtjes dhe sigurisë.