Autoritetet çeke thonë se 14 persona janë vrarë dhe dhjetëra janë plagosur nga të shtënat me armë zjarri në një universitet në Pragë.
Policia ka thënë se personi i armatosur, gjithashtu, ishte “eliminuar” pas sulmit në Universitetin Charles, në sheshin Jan Palach në qendër të qytetit.
Kryeministri i Republikës Çeke, Petr Fiala, ka thënë se kishte anuluar angazhimet e ardhshme në dritën e “ngjarjeve tragjike”.
Stafit të universitetit iu tha të “qëndrojnë në vend“, të barrikadojnë veten në dhoma dhe të fikin dritat, raporton Reuters.
Targ Patience, një britaniko-australian, i cili po qëndronte në një apartament afër vendit të ngjarjes, i ka thënë BBC-së se kishte dëgjuar “shumë të shtëna armësh“.
“Unë pashë nga ballkoni im dhe pashë policinë të mbërrinte. Disa oficerë po e kishin të vështirë të ndalonin njerëzit që po shkonin drejt vendit të ngjarjes”, ka thënë Patience.
Pamjet e verifikuara nga vendi i ngjarjes dukeshin se tregonin njerëz të kapur në murin e jashtëm të ndërtesës së universitetit, disa kate më lart.
Studentët thanë se ishin barrikaduar në klasa.
“Aktualisht i mbërthyer brenda klasës sime në Pragë“, ka shkruar Jakob Weizman në platformën X, një student në Universitetin Charles.
“E mbylla derën përpara se gjuajtësi të përpiqej ta hapte”.
Një email drejtuar stafit në Fakultetin e Filozofisë të Universitetit Charles, i parë nga Reuters, ka paralajmëruar stafin për të shtënat.
Shkruhej “Qëndroni, mos shkoni askund, nëse jeni në zyra, mbyllini ato dhe vendosni mobiljet para derës, fikni dritat”.
Autoritetet thanë se i gjithë sheshi dhe disa rrugë përreth universitetit ishin të mbyllura.
Universiteti Charles ndodhet në qytetin e vjetër të Pragës, rreth 500 metra nga Ura historike e Karlit, një magnet turistik. /BBC