Pesë persona janë shoqëruar në stacione policore nga Policia e Kosovës. Atyre u janë sekuestruar pesë armë zjarri dhe municion.
“Zyrtarët policorë të stacioneve dhe njësiteve të Drejtorisë Rajonale të Policisë në Prishtinë, gjatë javës së parë të janarit, kanë shoqëruar në stacione policore pesë persona, të cilëve u janë sekuestruar pesë armë zjarri dhe municion”, thuhet në njoftim.
Sekuestrimi, sipas policisë, është bërë në lokacione dhe raste të ndryshme. Katër nga të dyshuarit janë liruar në procedurë të rregullt kurse njëri është dërguar në mbajtje për 48 orë.
“Personave të dyshuar u është iniciuar rast për mbajtje në pronësi, kontroll ose posedim të paautorizuar të armëve dhe në konsultim me prokurorin e shtetit, katër nga ta janë liruar në procedurë të rregullt, ndërsa njëri nga të dyshuarit, i cili dyshohet edhe për përdorim të armës, është dërguar në mbajtje për 48 orë”, thuhet në njoftim.
