“Situata është skajshmërisht shqetësuese. Demokracia është në rrezik. Gjermania është një nga ithtarët më të fortë që shtetet e Ballkanit Perëndimor, përfshirë edhe Serbinë, të bëhen anëtare të BE-së. Por për shumë evropianë të përkushtuar dhe miq të Ballkanit Perëndimor, Presidenti Vuçiq dhe regjimi i tij nuk janë më partnerë të besueshëm. Në BE nuk ka vend për shërbëtorët e Putinit”.
Kështu është shprehur në një intervistë për portalin serb “Nova” kryetari i Këshillit për Punë të Jashtme të Bundestagut gjerman, Michael Roth, teksa është pyetur se në çfarë mënyre Gjermania, si shteti më i fuqishëm në BE, mund të ndikojë tek autoritetet serbe që të zbatojnë rekomandimin për përsëritjen e zgjedhjeve.
Sipas tij, Serbia gjatë mandatit presidencial të Vuçiqit, ka humbur gjithnjë e më shumë statusin e një demokracie, në masën e saj të plotë.
Ai thekson se parregullsitë zgjedhore konfirmuan edhe një herë këtë trend alarmant.
“Vëzhguesit ndërkombëtarë në këto zgjedhje raportuan për blerjen e votave dhe përdorimin e votuesve në favor të SNS-së në pushtet. Këto janë metoda nga arsenali i sundimtarit autokrat – e jo të një presidenti që është i përkushtuar ndaj demokracisë dhe sundimit të së drejtës dhe që dëshiron ta çojë vendin e vet në BE. Mirëpo, Vuçiq nuk kërcënon vetëm paqen e brendshme në Serbi, ai është edhe dikush që shkakton probleme të vazhdueshme në rajon. Kujtoni vetëm precedentin me dislokimin e trupave në kufirin me Kosovën, kah fundi i shtatorit 2023”, u shpreh ai.
Pos kësaj, Roth shtoi se ka përshtypjen që në Serbi presidenti Vuçiq po i merr kritikat në mënyrë konstruktive.
“Në vend të kësaj, ai përhap teori konspirative, reagon ashpër dhe përpiqet të frikësojë ata që marrin pjesë në protestat e opozitës dhe të shoqërisë civile”, shtoi ai.
Roth shprehet mirënjohës që Ministria gjermane e Punëve të Jashtme reagoi shumë herët dhe shumë qartë në lidhje me parregullsitë në zgjedhje në Serbi.
“Theksuan se frikësimi i votuesve dhe blerja e votave janë “të papranueshme” për një vend me statusin e kandidatit për anëtarësim në BE. Për mua, i vetmi përfundim që mund të nxirret nga kjo analizë e saktë është se zgjedhjet duhet të rishikohen dhe, nëse pohimet vërtetohen, të anulohen dhe të përsëriten. Këtë kritikë e mbështetet një shumicë e madhe në Bundestag, duke përfshirë edhe opozitën demokratike”, tha ai.
Teksa pyetet se si i komenton “akuzat”, e shpeshta se Gjermania po përzihet në punët e brendshme të Serbisë, Roth thotë se në BE më nuk vlen parimi klasik i mosndërhyrjes në punët e brendshme të shteteve të tjera.
“Përkundrazi: ekziston edhe detyrim për ndërhyrje”, tha ai.