Presidentja e Kosovës, Vjosa Osmani, të hënën, ka udhëtuar për në Mal të Zi për të marrë pjesë në Samitin e Demokracisë të Evropës Juglindore.
Sipas njoftimit të Presidencës, ky samit do të ketë temën “Lufta në Evropë: ndikimi në Ballkan” të organizuar nga Instituti Ndërkombëtar Republikan nga ShBA-të.
Më tutje, thuhet se në këtë konferencë, e para e vendit, Osmani do të jetë ndër folësit kryesor dhe në fjalimin e saj do të flasë për zhvillimet e fundit në rajonin e Ballkanit në aspektin e sigurisë, si dhe implikimet e luftës në Ukrainë për Ballkanin Perëndimor.
Përveç Presidentes Osmani, në këtë konferencë do të marrin pjesë edhe zyrtarë ndërkombëtarë, si i dërguari i ShBA-së për Ballkanin Perëndimor, Gabriel Escobar, i dërguari i Britanisë së Madhe për Ballkanin Perëndimor, Stuart Peach, dhe ngarkuari i BE-së për dialogun Kosovë-Serbi, Miroslav Lajçak.
Ndërsa nga radhët e përfaqësuesve të rajonit, në këtë konferencë do të marrin pjesë, kryeministri i Malit të Zi, Dritan Abazoviq, ministrja për Çështje Evropiane e Malit të Zi, Jovana Maroviq dhe zv.kryeministri i Maqedonisë së Veriut, Bojan Marichikj.