Avokati Tomë Gashi ka deklaruar se rasti i vrasjes së politikanit serb, Oliver Ivanoviq, brenda pak muajve do të marrë epilogun nga Gjykata në Prishtinë.
Kështu tha ai në emisionin “Debat Plus” në RTV Dukagjini, ku po diskutohet për prapaskenat e vrasjes së Ivanoviqit.
Gashi theksoi se motivi i vrasjes do të dihet atëherë kur Serbia do të demokratizohet.
“Rasti i Oliver Ivanoviqit besoj që shumë shpejt, për pak muaj, mos të them për pak javë, do ta marrë epilogun nga Gjykata e Prishtinës. Mirëpo dilemat rreth ekzekutorëve, rreth motivit të kryerjes së vrasjes së tij besoj që nëse ndonjëherë Serbia demokratizohet atëherë mundemi ta dimë të vërtetën e vrasjes së tij”, tha Gashi.
Sa u përket dëshmitarëve që fillimisht kishin dëshmuar, sipas Gashit, një pjesë e madhe e tyre janë ndier të frikësuar e që më pas si pasojë e kësaj të njëjtit më parë i kanë pranuar pasojat juridike sesa të japin versionin e tyre ashtu siç kishin bërë më herët.
“Edhe pse ka pasur kërcënime juridike, jo tjera, një pjesë e madhe e dëshmitarëve duke u ndier të frikësuar nga bandat kriminale saqë më tepër kanë pranuar që të kenë pasoja juridike sesa ta japim versionin e tyre që e kanë thënë më herët”, tha ai.