Ministrja e Punëve të Jashtme dhe Diasporës, Donika Gërvalla, ka takuar të mërkurën homologen e saj nga Principata e Monakos, Isabelle Berro-Amadei.
Gjatë këtij takimi, siç ka njoftuar MPJD-ja, të dyja ministret kanë shprehur përkushtimin e vazhdueshëm për të forcuar bashkëpunimin ndërmjet dy vendeve.
Në kuadër të vizitës dyditore në Monako, Gërvalla në takim me homologen e saj të Monakos ka diskutuar tema të ndryshme me interes të përbashkët.
Në këtë bisedë është përfshirë bashkëpunimi në organizatat ndërkombëtare, thellimi i marrëdhënieve bilaterale, zgjerimi i fushës ekonomike, si dhe shkëmbimi i përvojave në diplomacinë publike.
Ministrja Gërvalla e ka informuar homologen e saj rreth situatës aktuale të sigurisë në Kosovë, veçanërisht duke përmendur sulmin e fundit të Serbisë në Banjskë dhe rreziqet që kërcënojnë sigurinë dhe stabilitetin në Ballkanin Perëndimor.
Gjatë takimit, ministrja Gërvalla ka shprehur falënderim ndaj Principatës së Monakos për mbështetjen e madhe që i ka ofruar Kosovës në shumë fusha të ndryshme.
Në veçanti, ka theksuar kontributin e tyre në fushën e telekomunikimit, anëtarësimin në Organizatën Ndërkombëtare të Frankofonisë, mbështetjen për organizimin e Lojërave Mesdhetare 2030, anëtarësimin në Kartën Rinore Evropiane – EYCA, si dhe në procesin e anëtarësimit në Këshillin e Evropës.