Ministrja e Drejtësisë, Albulena Haxhiu, këtë të martë ka pritur në takim homologun danez, Peter Hummelgaard, në Ministrinë e Drejtësisë.
Siç ka njoftuar Ministria e Drejtësisë, gjatë diskutimeve, fokus kryesor ishte rëndësia e ratifikimit të Marrëveshjes në mes të Republikës së Kosovës dhe Mbretërisë së Danimarkës për shfrytëzimin e hapësirave të burgut në Gjilan.
Nga muaji korrik, sipas njoftimit, marrëveshja ka mbetur pa u ratifikuar për shkak të bllokimit nga opozita me mosvotim të marrëveshjeve ndërkombëtare.
Haxhiu ka njoftuar se Shërbimi Korrektues i Kosovës ka filluar procedurat për hartimin e specifikave teknike për adoptimin e hapësirave banuese, si dhe për rekrutimin e stafit shtesë.
Marrëveshja pritet të diskutohet dhe votohet në seancën plenare të datës 15 shkurt nga deputetët.
“Ministria e Drejtësisë, mbetet e përkushtuar për ta fuqizuar bashkëpunimin me shtete mike si Mbretëria e Danimarkës”, thuhet në njoftimin e Ministrisë së Drejtësisë.