Tensionet në veri të Kosovës të shkaktuara nga qytetarë të komunitetit serb janë bërë “mollë sherri” herë pas here në raportet e Kosovës me ndërkombëtarët në tri vitet e fundit.
Raste kishte kur i pari i Qeverisë Albin Kurti ra pre e presioneve ndërkombëtare ishin të rralla, por një ndër herat që kryeministri “dëgjoi” ndërkombëtarët ishte fundi i vitit 2022 kur shtyu vendimin për ndalimin e targave ilegale serbe.
Ai dha disa afate për konvertimin e targave në RKS pas presionit të vazhdueshëm ndërkombëtar.
Por, vendosja e kryetarëve shqiptarë nëpër komunat me shumicë serbe me ndihmën e njësive speciale të Policisë që pasoi me protesta të dhunshme në veri, Kosovës ia solli “shuplakat” më të mëdha nga aleatët.
E para ishte përjashtimi i FSK-së nga stërvitja më e madhe e aleatëve të NATO-s në Ballkan, e njohur si “Defender Europe ‘23”.
Kjo ndodhi dy vjet pasi që Kosova u trajnua pikërisht për këtë stërvitje, dhe më 2023 ishte nikoqire e saj.
SHBA-ja tha se ky ndëshkim për Kosovën erdhi si pasojë e injorimit të këshillave të tyre për deeskalim të situatës në veri.
Mosveprimet e menjëhershme të Kosovës për ulje të tensioneve në komunat veriore sollën veprime nga ana e Bashkimit Evropian, masat ndëshkuese.
BE-ja në masa përfshiu bllokim fondesh, pezullim të ftesave për pjesëmarrjen e Kosovës në ngjarjet e nivelit të lartë dhe vizitave dypalëshe nga BE-ja.
Po ashtu, në këtë periudhë Kosova mbeti jashtë programit të Evropës Digjitale, program financues të BE-së me vlerë 7.5 miliardë euro.
Krejt këto veprime u arsyetuan me padëgjueshmërinë e Kurtit në kërkesat për të ulur tensionet në veri, ani pse kryeministri kishte bërë disa propozime për të dalë nga ajo situatë.
E kritikat ndërkombëtare e mbërritën kulmin këtë fillim vit.
Aleatët akuzuan Kurtin se pa koordinim paraprak me ta, Banka Qendrore e Kosovës miratoi rregulloren e re, e cila e ndalon përdorimin e dinarit serb për pagesa me para të gatshme.
Sipas ambasadorit amerikan në Kosovë çështja e dinarit serb ka ndikuar në cilësinë e marrëdhënieve me SHBA-në
Megjithatë, kryeministri Kurti beson se partneriteti me Amerikën nuk po rrezikohet.