Analisti Imer Mushkolaj ka folur për Ministrat e Qeverisë Kurti 2 dhe ka thënë se e ka të vështirë që ta zgjedhë më të dobëtin, sepse ka shumë të dobët. Por, ai ka veçuar dy ministrat kryesorë, ministrin e shëndetësisë dhe atë të arsimit.
Tutje, ai ka thënë se për 15 muaj qeverisje nga Qeveria Kurti 2, nuk janë përmbushur premtimet të cilat i kanë dhënë gjatë fushatave.
“Për fat të keq nuk i kanë përmbushur pritjet e mija si qytetar dy ministritë në fjalë”, ka thënë Mushkolaj.
I ftuar në emisionin “Debat Plus”, Mushkolaj ka shprehur pakënaqësitë e tij ndaj ministrit të Shëndetësisë, Rifat Latifi, për të cilin ka thënë “mund të jetë me renome ndërkombëtare, por si menaxher është i dobët, edhe ajo po tregohet përditë, sepse unë nuk po shoh ndryshime”.
Dhe për sistemin e arsimit, Mushkolaj ka thënë se nuk ka parë ndryshime, ndërkaq pritjet e tij ndaj Rifat Latifit dhe Nagavcit kishin qenë të larta, sepse kishte pritur veprime konkrete prej tyre.
Ndërsa, Ministrja e Punëve të Jashtme dhe Diasporës, Donika Gërvalla-Schwarz në listën e ministrave më të dobët të Qeverisë Kurti 2, e merr pozitën e tretë si më e dobëta e këtij e ekzekutivi, ka thënë Mushkolaj.
Ndërsa, ai ka vlerësuar në mënyrë pozitive Ministren e Drejtësisë Albulena Haxhiu, sepse, sipas tij, kjo e fundit ka bërë disa ligje e iniciativa dhe është më transparente se të tjerët.