Gjatë ditës së djeshme, “Albanian Post” ka raportuar se zëvendëskryeministrja e Kosovës dhe ministrja e Punëve të Jashtme, Donika Gërvalla, ka kërkuar nga Gjermania që ta largojë nga Kosova ambasadorin aktual të Gjermanisë në Kosovë, Jorn Rohde.
Por këtë e ka mohuar ministrja Gërvalla.
Në një postim në Facebook, ajo ka thënë se pretendimi se e ka kërkuar largimin e Rohdes është “sa i pavërtetë, aq edhe absurd”.
“Pretendimi që kinse paskam kërkuar largimin e ambasadorit gjerman Rohde është sa i pavërtetë, aq edhe absurd. Është në vazhdën e fushatave dhe sulmeve të përditshme ndaj meje dhe institucionit që drejtoj”, ka shkruar Gërvalla në Facebook.
Tutje ajo ka ironizuar duke thënë se nuk duhet të befasohet askush kur të lexojnë që ajo ka kërkuar edhe shkarkimin e kancelarit Scholz dhe të homologes së saj.