Inspektorati Policor i Kosovës (IPK) ka arrestuar të premten një polic nën dyshimin për kryerjen e veprës penale të “Keqpërdorim i detyrës zyrtare apo autoritetit” dhe “Marrje ryshfeti”.
Kjo pasi hetuesit e IPK-së kishin filluar hetimin mbi rastin pasi pranuan informacionet se zyrtari kishte pranuar 1000 euro për të plotësuar dy vendime kundërvajtjeje fiktive (të rreme).
Pas disa veprimeve hetimore dhe operative në teren është arrestuar i dyshuari në Gjakovë, një zyrtar i Njësisë Rajonale të Komunikacionit Rrugor – Drejtoria Rajonale e Policisë Gjakovë, kurse nga prokurori kompetent i është caktuar masa e ndalimit për 48 orë.
“Bazuar në veprimet hetimore që hetuesit e IPK-së kanë realizuar deri më tani, dyshohet se zyrtari policor ka pranuar 1000 Euro për të plotësuar dy vendime për kundërvajtje (fiktive), njëra me vlerë prej 500 euro, me 3 pikë negative dhe masë mbrojtëse prej 1 viti dhe tjetra në vlerë prej 200 euro duke përdorur të dhënat e pa sakta të qytetarëve”, thuhet në njoftimin e IPK-së.
Po ashtu, IPK-ja ka iniciuar procedurë penale edhe ndaj një qytetari me dyshimin se i njëjti ka kryer veprën penale “Dhënia e ryshfetit”, duke i ofruar zyrtarit policor 1000 euro dhe për deklarim të rremë.