Shefi i Grupit Parlamentar të Kosovës, Abelard Tahiri, teksa ka akuzuar qeverinë e udhëhequr nga kryeministri Albin Kurti, e ka quajtur të pabesueshme guximin që sipas tij “kanë filluar të abuzojnë me paranë publike ministrat e qeverisë aktuale”.
Me anë të një postimi në llogarinë e tij në Facebook, Tahiri ka thënë se dy ministra protagonistë të një afere të tillë, ministrja Donika Gërvalla dhe ministri Fikrim Damka, “i keqpërdorën 1.1 milion euro, duke i ndarë këto para jashtëligjshëm ndaj një OJQ-je”.
“Është e pabesueshme se me çfarë guximi kanë filluar të abuzojnë me paranë publike ministrat e Qeverisë Kurti, duke mos u tunduar të dinë për ligjin, lere më t’iu nënshtrohen ligjeve kur është fjala për shpërndarjen e parave të taksapaguesve të Kosovës”, ka shkruar Tahiri.
Keqpërdorimi dhe abuzimi i jashtëligjshëm, ngjashëm “si edhe afera të tjera korruptive, që po dalin në shesh për çdo ditë”, sipas deputetit Tahiri tregojnë fytyrën e vërtetë të kësaj qeverie dhe papërgjegjësinë e saj karshi ligjit e qytetarëve.
“Kjo aferë, përveç që shpërfaq paaftësinë institucionale të kësaj qeverie, shpërfaq edhe vetëbesimin e verbër se këta ministra janë mbi ligjin, dhe se paranë publike e konsiderojnë si mjet për të mbuluar deficitet e tyre të gjithanshme, pa ndjerë kurrfarë përgjegjësie për to, e për mënyrën se si shpenzohen ato”, shtoi ai.
Ndryshe, PDK, të mërkurën e një qershorit, përmes një konference për media ka pretenduar se ministrat, Donika Gërvalla-Schëarz dhe Fikrim Damka kanë keqpërdorur 1.1 milion euro.
Deputetja e PDK-së Ariana Musliu-Shoshi, ka thënë se lidhja e bashkëpunimit në mes të Ministrisë së Zhvillimit Rajonal dhe Caritas-it, ka qenë e kundërligjshme, përmes së cilës sipas saj është dëmtuar buxheti i shtetit.
“Fjala është për një “Memorandum Bashkëpunimi”, në mes të Ministrisë së Zhvillimit Rajonal dhe Caritas-it Zviceran, në bazë të së cilës, buxheti i Republikës së Kosovës shpenzohet kundërligjshëm në shumë prej 1 milion e 40 mijë euro”, ka thënë ajo.
Kjo marrëveshje është nënshkruar dhe tashmë është duke u realizuar, por një gjë e tillë ka ndodhur vetëm pas pëlqimit zyrtar të cilin e ka nënshkruar Donika Gërvalla–Schwarz, e cila i ka hapur rrugë nënshkrimit të kundërligjshëm të saj, duke inkurajuar dhe lejuar kështu keqpërdorimin e rreth 1 milion e 40 mijë eurove.”, ka vijuar deputetja Musliu-Shoshi.
Sipas Shoshit, nënshkrimi i atij memorandumi bashkëpunimi me Caritasin ka qenë i paligjshëm, për shkak se kjo organizatë është regjistruar si e tillë në Ministrinë e Administratës Publike.
“Memorandumi është nënshkruar më 16 gusht 2021 nga ministri Damka dhe Caritasi. Statusi ligjor i këtij të fundit është organizatë joqeveritare e regjistruar si e tillë në Ministrinë e Administratës Publike. Në këtë rast, Ministria e Zhvillimit Rajonal, jo vetëm që nuk ka autorizim ligjor, por është shprehimisht e ndaluar me legjislacionin ne fuqi që shpenzimi i buxhetit të bëhet në mënyrë siç është vepruar në këtë proces”, ka thënë ajo.
Me këtë rast, Partia Demokratike e Kosovës u ka bërë thirrje institucioneve të hetuesisë që të merren urgjentisht me hetimin e këtij rasti.