Kuvendi i Kosovës ka dështuar përsëri ta miratojë Projektligjin për shëndetin riprodhues (IVF) gjatë seancës të së enjtes, për shkak të mungesës së deputetëve në votim.
Në përpjekjen e parë për të votuar amendamentin e katërt të Projektligjit morën pjesë vetëm 46 deputet, ndërsa në tentimin e dytë vetëm 54, nga 120 deputetë sa ka Kuvendi.
Kjo është hera e katërt radhazi që Qeveria tenton t’i votojë amendamentet e propozuara nga deputeti i Vetëvendosjes, Visar Korenica.
Në votim nuk morën pjesë deputetët nga partitë opozitare, Lidhja Demokratike e Kosovës, Partia Demokratike e Kosovës dhe Aleanca për Ardhmërinë e Kosovës.
Po ashtu, në parim u miratua projektligji për Komisionin e Pavarur të Mediave, Projektligji për sportin dhe ai për tekstet shkollore.
Ndërsa, për projektligjin për gjendjen civile nuk ka pasur kuorum.
Nuk ka kaluar as propozim-rezoluta për gjendjen në shëndetësi dhe sigurimet shëndetësore të propozuar nga AAK-ja.
Ndërkaq, nuk ka pasur kuorum as për t’u votuar marrëveshjet ndërkombëtare gjatë kësaj seance. Votimi është shtyrë për një seancë tjetër.