Presidenti i Shteteve të Bashkuara të Amerikës (SHBA), Joe Biden, ka theksuar se është i nderuar ta mirëpresë Suedinë si anëtaren e 32-të NATO-s, duke u shprehur se tash Aleanca “është më e fortë se kurrë”.
Në rrjetin social X, Biden ka shkruar se siguria dhe mburoja transatlantike është më e fortë.
“Sot, kam nderin të mirëpres Suedinë si Aleatin e 32-të të NATO-s. 75 vjet më parë, kur u krijua NATO-ja, presidenti Truman tha se Aleanca ‘do të krijonte një mburojë kundër agresionit dhe frikës nga agresioni’. Kjo mburojë – dhe siguria transatlantike – është më e fortë se kurrë”, ka shkruar Biden.
Kryeministri suedez, Ulf Kristersson, ka deklaruar se “uniteti dhe solidariteti” do të jenë “dritat udhëzuese” të Suedisë.
Ndërsa, sekretari amerikan i Shtetit, Antony Blinken, ka thënë mes të tjerash se “gjërat e mira vijnë për ata që presin”.
Sekretari i përgjithshëm i NATO-s, Jens Stoltenberg, ka deklaruar në një deklaratë në X se Suedia sjell me vete “forca të armatosura të afta dhe një industri të mbrojtjes të klasit të parë” dhe se aleanca ishte bërë “më e fortë dhe më e sigurt”.
Suedia aplikoi për t’u bashkuar me aleancën e mbrojtjes pas pushtimit të plotë të Ukrainës nga Rusia në vitin 2022 – por kërkesa e saj u bllokua nga dy anëtarë.