Festivali Folklorik “I Këndojmë Lirisë” është një festival muzikor që zhvillohet periodikisht në Klinë.
Pas përfundimit të luftës, çdo vit Klina dhe mbarë Kosova feston ditëlindjet e komandantëve të Ushtrisë së Lavdishme Çlirimtare, të cilët ranë për të mos vdekur kurrë.
Festivali sivjet shënon 20-vjetorin e rrugëtimit të tij. Edicioni i parë ishte mbajtur para dy dekadave, në një aromë lirie, në ditëlindjen e Komandantit të Zonës Operative të Drenicës – Brigada 113, Mujë Krasniqi-Kapuçi.
Ky festival manifestohet tri ditë radhazi nga data 6, 7, dhe 8 qershor, duke filluar në Çabiq, vendlindjen e Mujës, dhe për të vazhduar në Klinë.
Për tri netë performojnë rreth 700 artistë si, valltarë, grupe artistike e instrumentistë nga të gjitha trojet etnike shqiptare.
Festivali ka karakter garues, ku ndahen edhe 15 çmime, ku kryesori është çmimi “Mujë Krasniqi”. Në festival zhvillohen edhe aktivitete të tjera si, promovimi i librave, tryeza shkencore, ekspozita, panairi i prodhimeve vendore dhe gara në disiplina të ndryshme sportive.