Ministri i Mbrojtjes, Ejup Maqedonci ka pritur sot në takim shefin e Departamentit për Marrëdhënie me Jashtë të Ministrisë së Mbrojtjes së Turqisë, gjeneral brigade Omer Nafiz Gulmezoglu, i cili ishte i shoqëruar nga zyrtarë dhe oficerë të lartë të Turqisë.
Ministri Maqedonci e ka falënderuar gjeneralin Gulmezoglu për mbështetjen e pakursyer të Turqisë në të gjitha fazat e shtetndërtimit të Kosovës, në veçanti në fushën e mbrojtjes dhe sigurisë, si dhe ka shprehur vullnetin për vazhdimin e mëtejmë të bashkëpunimit mes dy vendeve.
“Nga ana e tij, gjenerali Gulmezoglu e falënderoi ministrin Maqedonci për pritjen miqësore dhe vuri në dukje se Turqia gjithmonë do ta mbështesë Kosovën në arritjen e qëllimeve të saj strategjike”, thuhet në njoftim.
Gjithashtu, gjenerali Gulmezoglu ka pohuar se Turqia është e interesuar dhe angazhohet në ruajtjen e paqes dhe stabilitetit në Kosovë e në rajon, dhe se kjo më së miri dëshmohet me prezencën e trupave turke në kuadër të KFOR-it.