Zyrtari i Lidhjes Demokratike të Kosovës, Berat Rukiqi, ka reaguar ndaj deklaratës së analistit Valon Syla, i cili ka thënë se kryetari i Kuvendit të Kosovës, Glauk Konjufca, është takuar javën e kaluar me kryetarin e LDK-së, Lumir Abdixhiku.
Këtë Rukiqi e ka quajtur të pavërtetë.
“Lajmi për takimin e kryetarit Abdixhiku me kreun e Kuvendit është i pasaktë”, shkroi ai në Facebook.
Sipas Rukiqit, LDK i ka publike dhe të qarta qëndrimet për zgjedhjet.
Ai ka kërkuar nga kryeministri i Kosovës, Albin Kurti, që të dorëhiqet, teksa tregon se kjo parti opozitare është e gatshme për zgjedhje.
“Kryeministri i dorëzuar duhet të japë dorëheqje, t’i tregojë qytetarëve pse po dorëzohet dhe ne jemi të gatshëm për zgjedhje”, shtoi ai.