Mali i Zi, Maqedonia e Veriut dhe Bullgaria kanë ndaluar fluturimin e avionit të ministrit të Jashtëm të Rusisë, Sergei Lavrov, i cili do ta vizitojë të hënën Beogradin.
Nga zyra e presidentit të Serbisë, Aleksandër Vuçiq, është njoftuar se të hënën në orën 10:00, presidenti serb do të takohet me ambasadorin rus në Beograd, Aleksandër Bocan-Kharchenko.
Ndërkaq, kreu i Ministrisë së Punëve të Jashtme ruse do të vizitojë Serbinë më gjashtë dhe shtatë qershor, shkruan Danas.
Kryeministrja e Serbisë, Ana Brnabiq, ka deklaruar se situata rreth mbërritjes së ministrit Lavrov në Beograd është “jashtëzakonisht e komplikuar” dhe se Vuçiqi po merret me logjistikën e udhëtimit të tij.
“Është vërtet e pabesueshme që situata në Evropë dhe në botë është e tillë që presidenti i një vendi duhet të merret me gjëra të tilla, siç është logjistika e udhëtimit të një ministri të jashtëm, që përcakton nëse ai do të vijë apo jo”, ka thënë ajo.
Ndërkaq, presidenti Vuçiq, kishte thënë se vizita e ministrit rus, Sergej Lavrov tashmë është planifikuar dhe se rezultati i vizitës është i pasigurt derisa të realizohet.
“Është e mundur që gjithçka të jetë mirë, dhe ka mundësi që të mos jetë. A është gjithçka e planifikuar? Gjithçka është planifikuar”, kishte thënë ai, duke shtuar se nuk përjashtohet që vizita Lavrovit në Beograd, mund të rrezikojë vizitën e kancelarit gjerman Olaf Scholz.
Ndryshe, Ballkani Perëndimor, përveç Serbisë, si kundërpërgjigje ndaj Rusisë për shkak të agresionit në Ukrainë, e ka mbyllur qiellin ndaj fluturimeve ruse.